|
Wenn mich einer fragt, was ein echtes hessisches Wort ist, dann sage ich ihm Ebbes.
Dieses Wort kann man für alles gebrauchen.
Wißt Ihr überhaupt was Ebbes ist?
Ebbes ist halt Ebbes und aus Ebbes kann man alles machen.
Wenn en junge Borsch heirate will, muß er sich Ebbes suche.
E Mädche, des Ebbes hat und Ebbes mitbringt. Un wenn er Ebbes gefunne hat, dann hat er Ebbes, denn do wo Ebbes is, kommt gewöhnlich noch Ebbes dezu.
Ebbes für’n Geldbeitel un aach Ebbes für’s Herz.
Also Ebbes für’s ganze Lewe:
Und dann werd Hochzeit gefeiert. Die derf schon Ebbes koste, damit mer sieht, daß ach Ebbes dehaam is.
Dann geht me uff die Hochzeitsreise.
Un uff so ner Reise da sieht mer Ebbes. Man erlebt Ebbes un kann Ebbes mitbringe un aach Ebbes erzähle.
Unn uff einmal, da erwart mer Ebbes. Die Nachbarschaft hat schun Ebbes gemerkt.
Die saache schon, die kriet Ebbes. Wenn des Kind dann im Bettche heult, dann hat’s vielleicht Ebbes. Wenn’s weiter heult, dann fehlt em Ebbes. Vielleicht hat’s blos Ebbes gemacht.
Kimmt der Bub in die Schul, da lernt er Ebbes. Wann der Lehrer Ebbes fragt, dann muß er Ebbes antworte.
Wann er aus de Schul kimmt, kimmt er in die Lehr, daß er Ebbes lernt un später Ebbes verdient, damit er seuner Mutter Ebbes gewwe kann.
Un daß später seu Fraa un seu Kinner Ebbes zu beiße hawwe.
Wißt Ihr jetzt was Ebbes is. Dann häbt Ihr wenigstens Ebbes gelernt. So is des halt, wer weiß was Ebbes iss, der gilt halt Ebbes.
|
